La nueit d’almetas

Con a plegada d’o día de Totz los Santos y lo Día de Defuntos, muitas localidatz recuperan l’antiga celebración, d’orichens celtas, d’a nueit d’as almas, nueit en a quala los espritos yeran autorizaus a abandonar los cementerios y “resucitar” apoderando-se d’os cuerpos d’os vivos.

La temor levaba a la chent a adornar las suyas casas con simbolos terrorificos, como canabastras y uesos, que heban de servir pa espantar a los espritos. Con a mesma fin se’n disvrazaben de personaches espantosos.

La doctrina catolica reconvertió esta antiga fiesta pagana en a nueit de difuntos, en la que las almas d’o purgatorio dondiaban en busca d’o descanso eterno y acudiban a nusatros en busca d’aduya, aduya que hebanos d’amprar-les a cambio d’a suya intercesión per nusatros pa aconseguir lo nuestro bien.

La celebración tradicional d’esta fiesta consiste en vuedar carbazas per un chicot forau feito en a suya base, fendo-les foraus con forma de uellos, nariz y boca d’aspecto terrorifico y metendo-les adintro una vela encendida. Estas carbazas se levaban en procesión per la nueit u se meteban en puertas y finestras pa espantar a la chent. I heba bella persona que se’n disvrazaba de pantasma y saliba a la carrera con a mesma fin d’espantar.

Entre la dictadura la celebración pagana estió prohibida, de traza que acabó cayendo en l’ixuplido, y ha estau fa uns pocos anyos quan de nuevo prencipioron a celebrar-se procesions con carbazas iluminadas y a recuperar-se beluns d’os ritos tradicionals propios d’a fiesta.

Dende alavez han estau numerosos los actos que s’han celebrau en Aragón con motivo d’a Nueit d’Almetas, y encara que los dos zaguers anyos han sufierto las conseqüencias d’a pandemia, este 2021 nos brinda ya bella ocasión de chuntar-nos arredol d’o fuego pa escuitar historias de broixas y alumbrar a las almetas a trobar lo suyo camín.

En concreto, la localidat oscense de Villanúa ha organizau una veilada con una serie d’actos arredol d’esta Nueit d’almetas, entre los quals figura un pasacarreras a cargo d’Os diaplerons d’o lugar y la presentación d’o disco Cierzo lento, un treballo de Javier Idoipe en o qual l’artista zaragozano se adentra en o mundo d’a mosica tradicional d’Aragón y d’a jota a traviés d’a mosica electronica.

Estes actos tendrán puesto en Vellanuga (Uesca) lo día 31 d’octubre de 2021.

Leave a Reply

This site uses Akismet to reduce spam. Learn how your comment data is processed.