Los Trucos d’a val de Chistau

La fermosa val de Chistau, en o Sobrarbe, recurre entre la nueit d’o 16 a lo 17 de chinero a un metodo particular pa espantar los malos espritos: lo rudio. Dimpués d’una copiosa cena en comunidat, una caravana de vecins recorre los lugars d’a val fendo sonar los trucos u esquillas d’o bestiar, organizando un gran estrapaluzio a lo qual tamién contribuyen qualques personas fendo sonar cuernos d’animals como los usaus en o pastoreo.

Truco (Foto: Idoia Guillén)

La comitiba no se limita a interpretar lo suyo particular serenata en as carreras d’os lugars, sino que entre lo recorriu en autos per las carreteras d’a val s’atura pa tocar los trucos en l’interior d’os túnels.

Esta particular forma d’invocar la protección d’os animals d’a val, recuperada fa unas de dos decenios, se conoixe como la Fiesta d’os Trucos y ye muito asperada per totz. Se celebra cada vispra de Sant Antón, no importa l’adversas que puedan estar las condicions climaticas (que habitualment lo son, y muito, en ixas calendatas). Mereixe la pena mencionar los enormes y bellos trucos que qualques personas se fan construyir expresament pa la ocasión, como este que amuestra la fotografía adchunta.