Cincomarzada 2020

O dia cinco de marzo, a ciudat de Zaragoza celebra l’heroico comportamiento d’os zaragozans entre a Primera Guerra Carlista.

A guerra civil mantenida dende 1833 dica 1840 entre os absolutistas, partidarios d’o infante Carlos María Isidro de Borbón, conoixius como que carlistas, y os partidarios d’Isabel II, partidarios d’un rechimen liberal, levó a las tropas de Juan Cabañero, militar carlista natural de Urrea de Gaén, a un intento de prene d’a ciudat de Zaragoza, a o mando de dos mil uitcientos infantes y trecientos hombres de caballería, o 5 de marzo de 1838. Os zaragozans privoron la prene d’a ciudat unindo as suyas fuerzas a l’exercito.

A resultas d’ista redota carlista s’adhibió a o escudo d’a ciudat a titulación de “Siempre Heroica” y se le dio o nombre de Cinco de Marzo a una carrera d’a ciudat. Dimpués d’a fin d’a guerra, o concello declaró festivo o 5 de marzo y os zaragozans adquirioron o costumbre de celebrar ixa calendata cada anyo salindo a l’arbolera de Macanaz a minchar y pasar o día. Este estió l’orichen de l’actual fiesta, conoixida como que Cincomarzada.

A fiesta estió suprimida en 1937, entre a guerra civil encetada por os golpistas un anyo dinantes, y a causa d’a dictadura militar en que desembocó a rechirada a fiesta no se recuperó dica 1981, dimpués d’o retorno d’a democracia a Espanya.

Inicialment as celebracions tenioron puesto en o Parque d’o Tío Jorge; en 2007 se tresladoron a o parque d’Oriente y actualment torna a estar o Parque d’o Tío Jorge o escenario habitual d’a fiesta, encara que con celebracions alternativas en o Parque d’o Ueste (vico Oliver) y o Parque d’a Razón (vico de Valdespartera).

Os zaragozans gosan celebrar en ixe día una minchada campestre amenizata con  mosica tradicional, conciertos, pasacarreras y mercadillos. En iste anyo 2020, como que ya ye habitual, o Parque d’o Tío Jorge recibirá as habituals reivindicacions vecinals con la Marcha d’os vicos, un pasacarreras que partirá a las 11:30 horas d’a Plaza d’o Pilar y, animau por os Gaiters d’o Rabal y Bucardo Folk, recorrerá la Avenida de Echegaray y Caballero, o Puent de Piedra, a carrera Sixto Celorrio, a plaza de Santo Gregorio y o Parque d’o Tío Jorge por la Avenida Central dica o escenario situau en a zona d’a pista de basket.