O Centro d’Estudios Históricos d’o Baixo Huerva presenta o viernes 20 de novembre, a las 19:00 h, en a ilesia parroquial de Muel, un prochecto pa recuperar as chotas y os choteros históricos d’a redolada, que abarca os lugars entre Cuarte de Huerva y Mezalocha. L’acto contará con l’actuación en directo d’os intérpretes d’a grabación y con a difusión d’as biografías de tres cantadors d’o sieglo XX.
O prochecto parte d’unas partituras transcritas en 1946 por o profesor Bernardo Benito, que las teneba aprendidas d’o suyo maestro Balbino Orensanz entre 1902 y 1904, por o que tendrían más de 120 anyos. Proceden de Cadrete, María de Huerva, Mozota y Muel. Anque as letras ya yeran conoixidas, as partituras presentaban pequeñas variants, asinas que o Centro decidió grabar-las pa la posteridat y fomentar o suyo uso en as escuelas de chota. A ellas s’ageda una chota de Botorrita grabada por Cecilio Navarro en 1923, dica completar cinco chotas.
Las interpretan Antonio Clos, de Muel, premio extraordinario d’o Certamen Oficial de Chota de Zaragoza en 2026, chunto a las suyas ixas María Pilar y Elena, tamién premiadas en o certamen. David Cay ha reconstruyito os arreglos de rondalla a partir de partituras d’a epoca.
O homenache recau en tres cantadors: Bernardo Benito y Felipe Cadena, totz dos de María de Huerva, destacatos respectivament en l’amostranza d’a chota y en a zarzuela, y Bienvenido Orga, de Cuarte de Huerva, ganador d’o certamen oficial de 1928 y presente en os teatros aragoneses dica la guerra civil. O prochecto, con grabación y folleto esplicativo, tiene o patrocinio d’os ayuntamientos de Muel, María de Huerva y Cadrete.
