O próximo miércoles 29 d’abril de 2026, a las 22:00 horas, o municipio de Luceni acullirá l’espectáculo Sentidos con Berna, una propuesta artística de gran nivel a cargo d’a Compañía Artística Osca.
L’evento contará con a participación de destacaus artistas d’o panorama aragonés, entre ellos o reconoixiu bailador y coreógrafo Miguel Ángel Berna, chunto a Lorena Margalló, Mercedes Budios y Roberto Ciria. L’espectáculo se completa con un amplo elenco de bailadors y a rondalla dirichida por Fernando Casaus, ufriendo a lo público una experiencia escénica de gran riqueza musical y visual.
A Compañía Artística Osca, baixo a dirección de Roberto Ciria, naixe con o firme proposito de preservar y difundir a jota aragonesa y o folclor tradicional. Dende a suya creyación, ha recorriu numerosos escenarios y localidatz d’Aragón, amostrando a lo público l’essencia d’una cultura fondament arraigada en o territorio. Cada una d’as suyas actuaciones representa un equilibrio entre o respecto a la tradición y a voluntat de mantener vivo o patrimonio cultural aragonés.
Figura central de l’espectáculo, Miguel Ángel Berna ye un d’os grans referents d’a danza española contemporánea. Con más de trenta anyos de trayeutoria, ha levau a jota aragonesa a escenarios de tot o mundo, consolidando-se como un creyador destacau por a suya capacidat de fusionar tradición y modernidat. Formau dende los ocho anyos en Zaragoza, Berna combina en o suyo luengache artístico a jota con disciplinas como o ballet clásico, a danza contemporánea y o flamenco, dando puesto a un estilo propio, ecléctico y innovador.
Sentidos con Berna se presenta como una oportunidat única pa disfrutar d’o talento aragonés y redescubrir a fuerza expresiva d’a jota en un formato renovau.
