Juan José de Mur Bernad, amás d’a suya extensa labor como mosico, mosicologo y compositor, tiene lo merito d’haber estau lo gran replegador, conservador y dibulgador d’a mosica tradicional de l’Alto Aragón. En 1970 publicó lo Canzionero Altoaragonés, que conteneba un centenar de cancions populars tradicionals de l’Alto Aragón transcritos en mosica y armonizaus per ell mesmo. En 1986 publicó lo Canzionero Popular d’a Provincia de Uesca, un extenso treballo que ha estau la referencia d’os estudiosos y entrepites d’o folklore d’a provincia entre mas de 30 anyos. Per si esto estase poco, en l’anyo 2015 enampla lo suyo primer treballo etnomosical con a publicación d’o Canzionero popular altoaragonés, contenendo la transcripción musical y, en o suyo caso, literaria de 452 melodías populars de l’Alto Aragón. Este chigant treballo documental ha estau la fuent d’an han bebiu estudiosos, curiosos, investigadors y mosicos, aragoneses y de difuera, y ha estau la vía per la quala totz hemos conoixiu este rico erenzio musical.
Per estas razons ye mas que mereixiu l’homenache que lo grupo Olga y los Ministriles ha levau a cabo con o suyo zaguer disco, tetulau precisamente Homenajje a Juan José de Mur. Olga y los Ministriles versiona beluns d’os temas musicals replegaus per Mur en os suyos canzioners, cudiadosament triaus y combinaus: jotas, albadas, cancions infantils, bailes populars, melodías de dance… triaus con un gran gusto, con uns elegants arreglos y una interpretación magnifica, ya que a la plantilla habitual d’o grupo (Olga Orús, Salvador Cored, Josu Ubierna, Antonio Orús, Sergio Rodrigo, Jesús Prades, Jairo Périz y Virginia Costea) s’han uniu beluns (muitos, pero no totz) d’os mosicos que han treballau estas mosicas de traza habitual u las han enriquiu con aportacions de diferents ambitos musicals u cheograficos: Mariano Pascual, Miguel Ángel Fraile, Antonio Viñuales, Ángel Vergara, Sergio Iguacel, Silvia Cored, Mikelo, Kepa Junquera, Eliseo Parra y La Ronda de Boltaña.
Olga y los Ministriles, tanto en a suya etapa actual como en o suyo anterior prochecto, Hato de Foces, s’han carauterizau per haber sabiu triar los temas mas fermosos d’os canzioners d’Aragón, polindo-los mas encara con os suyos lucidos arreglos musicals. Con o mesmo buen gusto han elaborau este disco homenache a Juan José de Mur.
Si bien, como contrapartida, Olga Orús y Salvador Cored anuncian en este disco la fin d’una extensa etapa (40 anyos) de recreación y divulgación d’a mosica tradicional altoaragonesa, habremos de confiar que la suya intención no sía mas que un mas d’ixes propositos d’anyo nuevo que esbiellamos anyo dimpués d’anyo, y asperamos veyer-les y sentir-les luego a lo frent d’este u unatro prochecto de trazas semellants, terreno en o qual han contrimostrau sobradamén la suya mayestría y buen fer.
