O veterano grupo Dulzainers d’o Baixo Aragón, con quasi cuarenta anyos de trayeutoria dedicada a la recuperación y difusión d’a música tradicional aragonesa, presenta o suyo nuevo treballo discografico: De palos, cintas y espadas.
Fundau en 1987, o grupo ha desenrollau una intensa fayena artistica y etnografica que l’ha levau a actuar por tota Aragón, diferents puestos d’Espanya y países como Alemanya, Francia, Italia, Hungría u Tailandia. A suya propuesta se caracteriza por reinterpretar as músicas populars y amostrarlas a o publico actual sin perder a suya esencia ni o suyo valor pedagogico.
O nuevo disco, De palos, cintas y espadas, s’adentra en a música festiva aragonesa y en os bailes populars que tradicionalment han acompañau celebracions en carreras y plazas. O repertorio recorre cheneros bailables d’o repertorio d’os gaiters, dende pasacarreras dica mudanzas de paloteau, y lo fa con a instrumentación rica y variada que caracteriza as interpretacions d’o grupo.
O treballo destaca por l’uso d’instrumentos tradicionals como a dulzaina, a gaita de boto, a zanfona u l’acordeón, combinados con percusión popular elaborada con cullars, sartens, güesos y atros obchectos cotidianos, evocando l’ambient espontaneo y festivo d’os antics bureos.
Concebido como disco y espectaclo, De palos, cintas y espadas propone un viache imaginario por a música festiva d’Aragón, recuperando melodías y ritmos transmitius de cheneración en cheneración.
Dulzainers d’o Baixo Aragón ye formau por:
Fernando Gabarrús – percusións, zanfona y voz
Rafel Sánchez – acordeón, gaita de boto, dulzaina y trompa
Diago Lezaún – chiflo, chicotén, dulzaina y percusións
Adrián Gil – gaita y dulzaina
Dulzainers d’o Baixo Aragón presentará o suyo nuevo disco o día 9 de mayo de 2026, a las 17:30 horas, en o C.C. Manuel Vázquez Guardiola de Zaragoza.
