Lo festival Matiné Musical’22 torna a trayer a lo Centro Civico Delicias de Zaragoza los conciertos a la hora d’o vermú. Este anyo de pre-normalidat lo fa con quatro grupos musicals de diversos estilos, entre los quals lo folk brila con luz propia gracias a la presencia d’os aragoneses O’Carolan y los castellanoleoneses Fetén Fetén. A ells s’unen David Angulo, que presentará lo suyo nuevo disco, y los guitarristas José Luis Arrazola, Alonso Martínez y Tolo Pueyo, qui presientan un espectaclo d’improvisación a lo rumbo d’as mas diversas corrients musicals.
Lo grupo folk O’Carolan naixió d’o repertorio creyau per lo mosico irlandés Turlough O´Carolan, autor de numerosas piezas musicals para arpa basadas en a tradición musical irlandesa, y muitas d’as qualas se siguen interpretando en l’actualidat.
Inspirau en a suya obra y en os sons d’a mosica tradicional de diversos puntos d’Europa, O’Carolan gravó los suyos tres primers discos, Alrededor de una vela, La llave de los sueños y El reloj secreto.
Lo suyo quatreno disco, Nota de paso, estió una mirada a la mosica tradicional d’Aragón con a optica celta que embullió los suyos treballos anteriors. Recientment, O’Carolan ha publicau lo suyo quinto treballo, Caleidoscopio, con esta mesma perspectiva musical encara que con una mayor incidencia sobre lo folklore musical d’Aragón, y con a colaboración d’o Cuarteto Concuerda.
Lo grupo O’Carolan ye formau por Susana Arregui (violín, nykleharpa y viola), Pilar Gonzalvo (arpa irlandesa, acordión diatónico), Ernesto Cossío (guitarra acustica), Julián Ansuategui (percusions) y Miguel Ángel Fraile (gaita de boto, gaita irlandesa, whistles, acordión).
Lo duo Fetén Fetén lo componen a partes iguals los mosicos burgaleses Jorge Arribas y Diego Galaz, qui realizan versions instrumentals de temas extraitos d’a tradición musical de meyo mundo con trastes como lo violín y lo acordión, a los quals s’une una variedat de trastes/artilugios de luthería no convencional, como lo sarrucho, la flauta siella de camping, lo recogeval u la sartana.
Os conciertos d’a Matiné Musical’22 tendrán puesto los días 8, 15, 22 y 29 de mayo, a las 12:30 horas, en o Centro Cívico Delicias de Zaragoza.
