Lo dance ye una d’as tradicions mas representativas d’o folklore musical d’Aragón, y hue per hue la mas viva. Numerosas localidatz aragonesas represientan lo suyo dance dimpués d’un fosco periodo en o qual la mayoría d’ells estioron ixuplidaus. Hue día gran parte d’estes dances tornan a las carreras d’os suyos lugars, protagonizaus per los propios ciudadans, que s’encargan de conservar-los, transmitir-los, actualizar-los y enriquir-los y en ocasions dica creyar-los de zero, fendo d’ells folklore autentico.
Lo dance de Escatrón (Zaragoza) no s’ha bailau dende 1925. Entre lo tiempo que estió inactivo ha sufierto lo esmarchinamién de l’ixuplido aporlargau, aliviau en parte per los treballos d’Arcadio de Larrea, qui conservó belún d’os suyos elementos recibindo-lo per tradición oral y levándolo ta partitura (l’immenso treballo de recopilación d’as tradicions musicals aragonesas que fació D. Arcadio de Larrea puede consultar-se integro en https://musicatradicional.eu).
Agora, gracias a una iniciativa d’o mosico Ángel Marín, s’ha estudiau tota la información publicada sobre este dance y lo proximo domingo 24 d’abril de 2022, a las cinco d’a tarde, se tornará a representar en Escatrón, en una mesa en scena cudiadosament fidel a lo baile, la mosica y lo vestuache que ha quedau alzada en a documentación existent.
En este prochecto s’han vulcau los components d’o Dance de Escatrón, embrecando a Carmen Barrachina como mayestra de baile y a los Gaiteros d’o Rabal, que lo domingo meterán la mosica a l’evento.
Este ye un punto de partida pa que lo dance torne a estar folklore vivo y lo lugar de Escatrón lo siga representando, incorporando cada anyo los elementos que considere apropiaus pa que este dance siga estando emblema d’a localidat y que no quede desactualizau y nuevament ixuplidau con o paso d’o tiempo.
Lo domingo 24 d’abril de 2022 será una fiesta gran en Escatrón.
