Os nombres de Nacho del Río y Beatriz Bernad serán ya pa siempre ligaus, de conchunta con o de Miguel Ángel Berna, a la naixencia d’una visión diferent, moderna, actual, d’a Jota Aragonesa. Beatriz y Nacho creyoron una forma de cantar-la y de vivir-la que la liberaba de l’encotillamiento adquiriu entre decenios y le ubriba nuevos camins, nuevos publicos, nuevos scenarios, y la convertiba en chenero artistico d’abantguardia.
A colaboración de Nacho del Río y Beatriz Bernad dio como primer fruto l’excelent espectaclo A Jota Ahiere y Hue, que endrezau por o mosico Alberto Gambino, con una gran experiencia y amplia visión en o tractamiento d’as mosicas populars de numerosos corneros d’o mundo, ha marcau un estrel que atros han seguiu, enriquindo d’ista traza o universo jotero con nuevas creyacions artisticas y brindando a la Jota Aragonesa o ficacio y l’intrés que muitos estamentos y organismos socials le negaban. Preba d’ixo ye a creyación d’a Fonoteca d’a Jota, por parte d’o Gubierno d’Aragón, y que endreza o propio Nacho del Río.
Beatriz Bernad y Nacho del Río contan con mas de 25 anyos de colaboración conchunta en a Jota Aragonesa y agora ofreixen un recital con o titol Jotas y Variants, que tendrá puesto lo 29 de setiembre de 2021 en Biota (Zaragoza) a las seis d’a tarde, acompanyaus per los mosicos Alberto Gambino, Belén Estage, Nieves Coscuyuela y Sergio Aso y los bailadors Alicia Guerri y Carlos Gil.
