Lo grupo folk O’Carolan naixió d’o repertorio creyau per lo mosico irlandés Turlough O´Carolan, autor de numerosas piezas musicals para arpa basadas en a tradición musical irlandesa, y muitas d’as qualas se siguen interpretando en l’actualidat.
Inspirau en a suya obra y en os sons d’a mosica tradicional de diversos puntos d’Europa, O’Carolan gravó los suyos tres primers discos, Alrededor de una vela, La llave de los sueños y El reloj secreto.
Lo suyo quatreno disco, Nota de paso, estió una mirada a la mosica tradicional d’Aragón con a optica celta que embullió los suyos treballos anteriors. Recientment, O’Carolan ha publicau lo suyo quinto treballo, Caleidoscopio, con esta mesma perspectiva musical encara que con una mayor incidencia sobre lo folklore musical d’Aragón, y con a colaboración d’o Cuarteto Concuerda.
O’Carolan presentará lo suyo nuevo disco en un concierto que ofrirá lo día 22 de setiembre, a las 20 horas, en a Sala Galve d’o Auditorio de Zaragoza.
Lo grupo O’Carolan ye formau por Susana Arregui (violín, nyckelharpa), Pilar Gonzalvo (arpa irlandesa, acordión diatónico), Ernesto Cossío (guitarra acustica), Julián Ansuategui (percusions) y Miguel Ángel Fraile (gaita de boto, gaita irlandesa, whistles, acordión).
