Biella Nuei ye una leyenda en o mundo folk aragonés. Naixe con a finalidat d’investigar, estudiar y divulgar lo folklore musical d’Aragón, tanto los suyos cantos y bailes como los suyos trastes musicals u las luengas en as cualas se transmite, con especial enfasis en l’aragonés.
Lo treballo realizau per Biella Nuei dende la suya creyación s’ha plasma en numerosos discos, beluns d’éls en colaboración con grans figuras d’a mosica de radiz d’atras comunidaz d’o mundo. Tamién han publicau libros y treballos d’investigación, y han organizau conferencias, conciertos didacticos, exposicions y multitut d’actividaz divulgativas.
Biella Nuei cumple agora 40 anyos y lo celebra con una fiesta aniversario en o Teatro Prencipal de Zaragoza. Con o títol Ordesa, l’árbol volador, lo concierto contará con a presencia d’o grupo acompanyau de cuantas d’as personalidaz d’o mundo d’a mosica de radiz que les han acompanyau en ixa singladura: La Ronda de Boltaña, Miguel Ángel Berna, Ixo Rai!, Nacho d’o Río, Javier Paxariño, Crestiàn Josuer y amigos occitans, La Orquestina d’o Fabriol, Dulzaineros d’o Baixo Aragón, Joaquín Pardinilla, María José Hernández, Los Artistas d’o Gremio, Lo Mantel de Noa, Idoipe, Ester Vallejo, Jorge Casasnovas, Olga León y Jesús Rubio, Utopía Mudéchar y Pepín Banzo. Tot un elenco que no desmerece pa cosa la gran calidat artistica d’o grupo folk mas representativo d’Aragón.
Lo concierto tendrá puesto lo día 16 de chunyo a las 20 horas.
