L’Arte d’a Jota

Lo 9 de chulio de 2013, lo Gubierno d’Aragón promulgaba la declaración de la jota aragonesa como Bien d’Interés Cultural, consensuata con una comisión d’expertos en a quala yeran representaus totz los sectors d’a jota en Aragón, dende la jota mas tradicional dica la mas artistica, incluyindo la bien conoixida *jota de recreación. Como colofón a los treballos conducentes a ixa declaración, la comisión establió que lo siguient paso difuera treballar en una declaración d’a jota como Patrimonio Immaterial d’a Humanidat per parte d’a UNESCO, de traza conchunta con as de demás comunidatz espanyolas en as qualas se canta y se baila la jota. Esta iniciativa quedó en suspenso entre quantos anyos pero recientment lo Gubierno d’Aragón la ha represo y ha promoviu un prochecto a lo qual s’han sumau con entusiasmo atras 15 Comunidatz Autonomas y que proximament conducirá a la presentación de la candidatura debant d’o proximo Consello de Patrimonio Historico, que se celebrará en Zaragoza los días 25 y 26 d’octubre.

Lo Gubierno d’Aragón, conscient d’a magnitut y la transcendencia d’este prochecto, no ha delegau la suya representación en qualsequiera: ye lo bailarín y coreografo aragonés Miguel Ángel Berna, que ha levau la jota per los escenarios de meyo lo mundo, la figura visible d’este prochecto en Aragón. Asinas, Berna será lo protagonista d’o espectaclo L’Arte d’a Jota, que s’ha programa con motivo d’a reunión en Zaragoza d’o Consello de Patrimonio Historico. Lo espectaclo se celebrará lo día 25 d’octubre de 2022, a las 21 horas, en o Auditorio de Zaragoza, y en ell participarán grans figuras d’o canto y baile d’a jota en Aragón, acompanyaus per un elenco d’extraordinarios mosicos.