Las “No Fiestas” d’o Pilar trayen a lo escenario d’a Plaza de Santo Bruno a un d’os pesos pesaus d’o folk peninsular, Eliseo Parra, de conchunta con o trio Vivere Memento y lo suyo repertorio de mosica tradicional.
Eliseo Parra ye un d’os mas grans investigadors y divulgadors d’o folklore musical espanyol. Ha colaborau con mosicos aragoneses como Ángel Vergara u Carmen París, y ye un referent en a revitalización d’a jota. Lo suyo treballo s’ha plasmau en numerosos discos, lo zaguer d’os quals, Cantar y bailar, será sin dubda protagonista d’este concierto.
Vivere Memento combina temas d’o repertorio tradicional aragonés con beluns cantos de l’extenso legado medieval forchau en a memoria d’os habitants y las culturas que han poblau la nuestra tierra a lo largo d’os sieglos. Cancions sefardíes tradicionals, temas d’a compilación de Martin Codax, d’o Llivre Vermell de Monsterrat, u melodías extraitas d’os cancioners populars replegaus a primers d’o sieglo XX, son una muestra d’este repertorio que María José Hernández, Joaquín Pardinilla y Luis Delgado trían y apanyan pa una variedat de trastes, no totz tradicionals, con un bellismo resultau.
Estes dos grans d’a mosica tradicional espanyola y aragonesa serán en a Plaza de Santo Bruno de Zaragoza lo día 11 d’octubre de 2021 a las 19 horas.
