Mercedes Pueyo realizó la suya tesi doctoral sobre lo dance aragonés. Esta investigación culminó en l’anyo 1961, deixando replegau un immenso treballo de documentación sobre lo fenomeno folklorico mas rico y mas extendiu d’Aragón.
Lo treballo se publicó en 1973, aportando una valurosisma información a quantos en aquells anyos prencipiaban a indagar y a tractar de recuperar los numerosos dances d’Aragón, desapareixius en a suya practica totalidat. Agora la Deputación Provincial de Zaragoza ha publicau este treballo en versión dichital, de conchunta con una colección d’apendices ineditos.
La edición se presentará en una charra-coloquio con a propia autora que tendrá puesto lo día 17 de mayo, a las 18 horas, en a Sala d’Asayos d’a Escuela Municipal de Mosica y Danza de Zaragoza. Dinantes, a las 11 d’o maitín, se ferá una presentación en a Sala de Prensa d’a DPZ. Y lo sabado 18, en o marco d’a chornada Alredol, pitas y cascabillos que se celebra en Sariñena, se ferá unatra presentación d’o libro, seguida d’una mesa redonda en a quala intervendrán los investigadors Pedro Mir, Jesús Cáncer, Mario Gros y Carolina Ibor, y d’una actuación d’o Dance de Sariñena.
Reedición facsímil: https://ifc.dpz.es/publicaciones/ver/id/3754
Apéndices: https://ifc.dpz.es/publicaciones/ver/id/3755
