Lo premio Mullers de Jota (Mujeres de jota) estió instituyiu per lo Centro Aragonés d’o Puerto de Sagunto con a finalidat de reconoixer la trayectoria artistica, docent y humana de mullers destacadas en o mundo d’a jota. En cadaguna d’as 12 edicions que, con a d’este anyo, conta lo premio, s’ha atorgau esta reconoixencia a una jotera de suficient renombre en tot Aragón y a unatra vinculada a lo Centro Aragonés d’o Puerto de Sagunto.
En a edición de 2019, lo premio irá a Teresa Pomar Peribáñez, per Aragón, y a Marisol Álvarez Fernández, per lo Centro Aragonés d’o Puerto de Sagunto.
La entrega de premios tiene puesto en o cabo de semana mas proximo a lo 8 de marzo, Día Internacional d’a Muller. En esta ocasión, la cita será lo sabado 9 de marzo de 2019, a las 18 horas, en o Centro Aragonés d’o Puerto de Sagunto. Lo elenco d’artistas convidaus a la gala d’entrega ye de primera: Nacho del Río, Lorena Larrea, Toño Julve, Ismael López, Susana Gil, Víctor Bajo, Ana Domínguez, Juanjo Almarza y Víctor Martín son los nombres d’os cantadors, mosicos y bailadors que acompanyarán en o escenario a Teresa y Marisol de conjunta con o Grupo de Jotas d’o Centro Aragonés.
Como complemento a l’homenache d’o día 9, s’ha programado una conferencia, impartida per César Rubio Belmonte, con o tema La jota en voz femenina: sus mujeres protagonistas en los albores del S. XX, lo día 6 de marzo a las 19:30 horas, y un taller de escritura creativa, con o tema Microrrelatos en forma de copla: mujer, Aragón y copla, a cargo de Toño Julve Marín, lo día 9 de marzo a las 12:30 horas.
